ශ්රී ලංකාවේ තේ, කෝපි සහ දුම්කොළ වගාව සංවර්ධනය කිරීම පිළිබඳ චීන දූත පිරිසක් සමඟ පැවති සාකච්ඡාවකදී දැඩි අවධානයක් යොමු වී තිබෙනවා.
කෘෂිකර්ම, පශු සම්පත්, ඉඩම් සහ වාරිමාර්ග කටයුතු පිළිබඳ අමාත්යාංශයීය උපදේශක කාරක සභාව සහ චීනයේ යුනාන් පළාත් මහජන කොංග්රසයේ ස්ථාවර කමිටුවේ උප සභාපතිවරයා වන යාන් යාලින්ගේ ප්රධානත්වයෙන් යුත් චීන නියෝජිත පිරිසක් අතර, කෘෂිකාර්මික සංවර්ධන අත්දැකීම් බෙදාගැනීම සහ අනාගත සහයෝගිතා අවස්ථා පුළුල් කිරීමට අදාළ සාකච්ඡාවක් පසුගියදා පාර්ලිමේන්තුවේදී පැවැත්වුණා.
කෘෂිකර්ම හා පශු සම්පත් ගරු නියෝජ්ය අමාත්ය නාමල් කරුණාරත්නගේ සභාපතිත්වයෙන් පැවති මෙම හමුවේදී තේ, කෝපි සහ දුම්කොළ වගා ක්ෂේත්රවල දෙරට අතර සහයෝගීතාව වැඩිදියුණු කිරීම කෙරෙහි අවධානය යොමු වුණා.
මෙහිදී අදහස් දැක්වූ නියෝජ්ය අමාත්ය නාමල් කරුණාරත්න පැවසුවේ අමාත්යාංශ මට්ටමින් මූලික සාකච්ඡාවක් දැනටමත් පවත්වා ඇති බවත්, මෙම හමුව මගින් මෙම දූත පිරිස සහ පාර්ලිමේන්තු මන්ත්රීවරුන් අතර මෙම ක්ෂේත්ර සම්බන්ධව දීර්ඝව සාකච්ඡා කිරීම අරමුණු කළ බවයි.
එසේම ශ්රී ලංකාවේ සංවර්ධන ක්රියාවලියට විවිධ අවදීන්හිදී චීනයෙන් ලැබුණු අඛණ්ඩ සහයෝගය අගය කළ නියෝජ්ය අමාත්යවරයා, ශ්රී ලංකාව සහ චීනය අතර පවතින දීර්ඝකාලීන මිත්රත්වය පිළිබඳව ද මෙහිදී විශේෂයෙන් අවධාරණය කළා.
තවද මෙවැනි සම්බන්ධතා දෙරට අතර සහයෝගීතාව වැඩිදියුණු කිරීමටත්, ශ්රී ලංකාවේ කෘෂිකාර්මික අංශය නවීකරණයට හා පුළුල් කිරීමටත් දායක වනු ඇති බවත් හෙතෙම වැඩිදුරටත් පෙන්වා දුන්නා.
තේ, කෝපි සහ දුම්කොළ කර්මාන්ත සංවර්ධනය පිළිබඳව දෙපාර්ශවයම මෙහිදී අදහස් හුවමාරු කරගත් අතර, නවීන තාක්ෂණික යෙදුම් කෙරෙහි විශේෂ අවධානයක් ද යොමු කර තිබෙනවා.
අඩුවීගෙන යන ශ්රම බලකාය හේතුවෙන් පැනනගින අභියෝග ජය ගැනීමටත්, තේ වගාවේ ඵලදායිතාව වැඩි දියුණු කිරීමටත් නව තාක්ෂණය භාවිත කිරීමේ අවශ්යතාවයද මෙහිදී සාකච්ඡා වුණා.
එසේම පසෙහි සාරවත් බව වැඩි දියුණු කිරීමට සහ බෝග අස්වැන්න වැඩි කිරීමට හතරවන පරම්පරාවේ පොහොර (fourth-generation fertilizers) භාවිත කරීම යෝග්ය බව චීන දූත පිරිස යෝජනා කළා.
කෝපි වගාව සම්බන්ධයෙන් ද මෙහිදී අවධානය යොමු වූ අතර, ශ්රී ලංකාවේ කෝපි කර්මාන්තය පසුගිය දශකය තුළ කැපී පෙනෙන ප්රගතියක් පෙන්නුම් කර ඇති බව මෙහිදී සඳහන් වූ අතර කෝපි වගාවන් සඳහා ඉඩම් වෙන් කිරීම පුළුල් කිරීමේ අවශ්යතාවයද සාකච්ඡා කළා.
දැනට හෙක්ටයාර් 5,000 කට අධික ප්රමාණයක කෝපි වගා කරන බවත්, ඉදිරි වසර දෙක තුළ එය හෙක්ටයාර් 10,000 දක්වා පුළුල් කිරීමට සැලසුම් කර ඇති බවත් නිලධාරීන් සඳහන් කළා.
එසේම ශ්රී ලංකාවේ දුම්කොළ කර්මාන්තය පිළිබඳව ද මෙහිදී සාකච්ඡා කරන ලද අතර, දුම්කොළ අමුද්රව්ය වෙනුවට වෙළඳපොළට සැකසූ අගය එකතු කළ නිෂ්පාදන අපනයනය කිරීම තුළින් ජාත්යන්තර වෙළඳපොළට ප්රවේශ විය හැකි බවද මෙහිදී මන්ත්රීවරුන් සඳහන් කළා.
එසේම ශ්රී ලංකාවේ දුම්කොළ කර්මාන්තය තවමත් කුඩා ප්රමාණයේ කර්මාන්තයක් ලෙස පවතින බවත්, කර්මාන්ත ශාලා කේන්ද්ර කරගත් මහා පරිමාණ කර්මාන්තයක් ලෙස එය සංවර්ධනය කිරීමේ වැදගත්කමත් චීන නියෝජිත පිරිස පෙන්වා දුන්නා.
මෙම රැස්වීමට අමාත්යාංශයීය උපදේශක කාරක සභාවේ සාමාජික මන්ත්රීවරුන් ඇතුළු පාර්ලිමේන්තු මන්ත්රීවරුන්, චීන නියෝජිත පිරිස සහ පාර්ලිමේන්තු සහ අමාත්යාංශ නිලධාරීන් සහභාගී වූණා.
newsforcelk #සත්යයේපෙරමුණ #newsforcelkworld #newsforceleklankanews #newsforcesrilanka #newsforcepolitical #ශ්රීලංකා #තේ #කෝපි #දුම්කොළ #කෘෂිකර්ම #පශුසම්පත් #ඉඩම් #වාරිමාර්ග #චීන #සංවර්ධනය
