ඉරානය සමග දැනට ක්රියාත්මක සති දෙකක සටන් විරාමය දීර්ඝ කිරීමට තමා අදහස් නොකරන බව එක්සත් ජනපද ජනාධිපති ඩොනල්ඩ් ට්රම්ප් ප්රකාශ කර තිබෙනවා.
කෙසේ වෙතත්, බටහිර ආසියාවේ පවතින ගැටුම අවසන් කිරීම සඳහා සාකච්ඡා මාර්ගයෙන් ගිවිසුමකට එළඹීම වඩාත් කැමති ප්රතිඵලය බවටයි ඔහු ඉඟි කර ඇත්තේ.
ABC පුවත් සේවයේ වොෂින්ටන් ප්රධාන වාර්තාකරු ජොනතන් කාල් සමග අදහස් දක්වමින් ජනාධිපතිවරයා පැවසුවේ, සටන් විරාමය දීර්ඝ කිරීම අවශ්ය වනු ඇතැයි තමා විශ්වාස නොකරන බවයි.
ඉදිරි වර්ධනයන් පිළිබඳව විශ්වාසය පළ කළ ට්රම්ප්, “මම හිතන්නේ ඔබ ඉදිරි දින දෙක තුළ පුදුමාකාර සිදුවීම් කිහිපයක් දකිනු ඇති. මම ඇත්තටම එහෙම හිතනවා,” යැයි පවසා තිබෙනවා.
යුද්ධය අවසන් වන්නේ ගිවිසුමක් මගින්ද නැතහොත් ඉරානයේ හැකියාවන් සහමුලින්ම විනාශ කිරීමෙන්ද යන්න විමසූ විට, ට්රම්ප් පවසා ඇත්තේ එම ප්රතිඵල දෙකම සිදුවිය හැකි නමුත් තමා වඩාත් කැමති රාජ්ය තාන්ත්රික මාවතට බවයි.
තම නායකත්වය පිළිබඳව ද අදහස් දැක්වූ ට්රම්ප්, “මම ජනාධිපති නොවන්නට ලෝකය කෑලිවලට ඉරී යනු ඇත,” යැයි ද ප්රකාශ කර තිබෙනවා.
එක්සත් ජනපදය සහ ඉරානය අතර අතිරේක සාකච්ඡා ඉදිරි දින දෙක තුළ පැවැත්විය හැකි බවට ‘New York Post’ පුවත්පතට පැවසීමෙන් පැය කිහිපයකට පසුවයි ට්රම්ප් මෙම අදහස් පළ කර ඇත්තේ.
දුරකථන සාකච්ඡාවකදී ට්රම්ප් සඳහන් කර ඇත්තේ, සාකච්ඡා දැනටමත් සිදුවෙමින් පවතින නමුත් ඒවා සෙමින් ඉදිරියට යන බවයි.
සති හතක ගැටුම අවසන් කිරීම සඳහා දෙවන වටයේ සෘජු සාකච්ඡා යුරෝපයේ කිනම් හෝ ස්ථානයක පැවැත්විය හැකි බව ඔහු යෝජනා කර තිබුණා.
කෙසේ වෙතත්, මිනිත්තු 30කට පමණ පසු සිදු කළ පසු විපරම් ඇමතුමකදී, සාකච්ඡා පවත්වන ස්ථානයේ වෙනසක් සිදුවිය හැකි බවත්, ඉස්ලාමාබාද් ඒ සඳහා වඩාත් සුදුසු ස්ථානය ලෙස පෙනෙන බවත්, ඔහු පවසා තිබෙනවා.
#newsforcelk #සත්යයේපෙරමුණ #newsforcelkworld #newsforceleklankanews #newsforcelocalnews #newsforcesrilanka #newsforcepolitical
