ඉන්දියාවේ ‘Mazagon Dock Shipbuilders’ සමාගම විසින් කොළඹ ඩොක්යාඩ් (Colombo Dockyard PLC) ආයතනයේ 51%ක පාලන කොටස් ප්රමාණයක් අත්පත් කර ගැනීම “සුවිශේෂී වර්ධනයක්” බවත්, එය ඉතා වැදගත් උපායමාර්ගික අංශයක කළ ආයෝජනයක් බවත් ඉන්දියාවේ විදේශ ලේකම් වික්රම් මිශ්රි පවසයි.
මේ සම්බන්ධයෙන් අදහස් දක්වමින් ඔහු වැඩිදුරටත් කියා සිටියේ, මෙම ගනුදෙනුව හරහා සමුද්රීය හා කාර්මික අංශවලින් ඉන්දියාව සහ ශ්රී ලංකාව අතර වර්ධනය වන සහයෝගිතාවය මනාව පිළිඹිබු වන බවයි.
ඉන්දීය ආරක්ෂක අමාත්යාංශය යටතේ පවතින රජයට අයත් නැව් නිෂ්පාදන සමාගමක් වන Mazagon Dock Shipbuilders Limited (MDL), ඇමෙරිකානු ඩොලර් මිලියන 26.8ක මුළු ආයෝජනයක් කරමින් කොළඹ ඩොක්යාඩ් ආයතනයේ පාලන කොටස් අත්පත් කර ගැනීමේ කටයුතු අවසන් කළ බව මෑතකදී නිවේදනය කළේය.
මෙම ගනුදෙනුවෙන් පසු කොළඹ ඩොක්යාඩ් ආයතනය නිල වශයෙන් MDL සමාගමේ අනුබද්ධ ආයතනයක් බවට පත් වී ඇති අතර, මෙය එම ඉන්දීය සමාගම ජාත්යන්තර මට්ටමින් සිදුකළ ප්රථම අත්පත් කර ගැනීම ලෙසද සනිටුහන් වේ.
MDL සමාගම පවසන්නේ මෙම පියවර ඉන්දියාවේ ‘Maritime Amrit Kaal Vision 2047’ දැක්මට සමගාමීව සිදුවන්නක් බවත්, මින් ඉන්දියාව සහ ශ්රී ලංකාව අතර සමුද්රීය සබඳතා තවදුරටත් ශක්තිමත් වනු ඇතැයි අපේක්ෂා කරන බවත්ය.
මේ වන විට කොළඹ ඩොක්යාඩ් ආයතනයේ අධ්යක්ෂ මණ්ඩලයද MDL සමාගමේ නායකත්වය යටතේ ප්රතිව්යුහගත කර තිබේ. නව ඇණවුම් සහ මෙහෙයුම් කටයුතු වැඩිදියුණු කිරීම හරහා මේ මූල්ය වර්ෂය තුළ ආදායම සහ ලාභය 20%කින් වර්ධනය කර ගැනීම තම ඉලක්කය බවද එම සමාගම වැඩිදුරටත් පවසා ඇත.
කොළඹ ඩොක්යාඩ් යනු ශ්රී ලංකාවේ විශාලතම නැව් තටාංගනය වන අතර, එය මෙරට සමුද්රීය කර්මාන්තයේ ප්රධානතම භූමිකාවක් නිරූපණය කරන ආයතනයකි.
