මාවිල්ආරු දියවර ඇපයට තැබූ සාහසිකත්වය
අවසන් කල විජයග්‍රහණයේ පියවර.

සටන් විරාම ගිවිසුමේ සෙවණැලි අතරින් මතු වූ LTTE ත්‍රස්තවාදීන් 2002 වසරේ සිට වරින් වර කුඩා ප්‍රහාර එල්ල කළ ද, ශ්‍රී ලංකා යුද හමුදාවේ සමස්ත ශක්තිය අවදි කරමින් මහා පරිමාණ සටනක් කරා ජාතිය මෙහෙයවන්නේ එක් අමානුෂික සිදුවීමක් මුල් කරගෙන ය. ඒ මාවිල්ආරු හී ජලය ඇපයට තැබීමයි.

මාවිල්ආරු: දියවර ඇපයට තැබූ සාහසිකත්වය
මාවිල්ආරු සොරොව්ව වසා දැමීමට පෙර යුද හමුදාවේ නායකත්වය හිඳුවීමේ අරමුණින්, 2006 අප්‍රේල් 25 වන දා එවකට යුද හමුදාපති ජෙනරාල් සරත් ෆොන්සේකා මහතාට මරාගෙන මැරෙන බෝම්බ ප්‍රහාරයක් එල්ල කෙරිණි. ඉන් එතුමා බරපතළ තුවාල ලැබුව ද ත්‍රස්තවාදීන්ගේ අරමුණ ඉටු වූයේ නැත. ඉන් නොනැවතුණු ඔවුහු, 2006 ජුනි 26 වැනි දා ශ්‍රී ලංකා යුද හමුදාවේ තෙවැනියා වූ නියෝජ්‍ය මාණ්‌ඩලික ප්‍රධානී මේජර් ජෙනරාල් පාරමී කුලතුංග මහතාව පන්නිපිටියේ දී මරාගෙන මැරෙන ප්‍රහාරයකින් ඝාතනය කළහ.

ඉන් අනතුරුව, නැගෙනහිර සිංහල, දමිළ හා මුස්ලිම් ජනතාව 30,000කට පමණ ජීවය දුන් මාවිල්ආරු ජලය ඇපයට තැබීමට ත්‍රස්තයෝ ක්‍රියා කළහ. 2006 ජූලි 21 දින සොරොව්ව වසා දැමීමත් සමඟ කුඹුරු අක්කර 30,000ක් සඳහා වූ ජලය අහිමි විය.

පිපාසයෙන් පීඩිත ජනයාට දියවර මුදාගැනීමේ මානුෂීය අරමුණින්, යුද හමුදාපතිවරයාගේ මඟ පෙන්වීම යටතේ මේජර් ජෙනරාල් පරාක්‍රම පන්නිපිටියගේ නායකත්වයෙන් රණවිරුවෝ පෙරමුණට ගියහ. ජූලි 26 වන දා ගුවන් හමුදාව සතුරු ඉලක්ක කුඩුපට්ටම් කරද්දී, 28 වන දා සිට පාබල හමුදාව ඉදිරියට ඇදුණි. ත්‍රස්තවාදීන්ට අන්ත පරාජයක් උරුම කර දෙමින් 2006 අගෝස්තු 15 දා මාවිල්ආරු දියවර නිදහස් කෙරිණි. යුද ජයග්‍රහණයේ ප්‍රථම අරුණළු වැටුණේ එතැනිනි.

මුතූර් සහ සාම්පූර්: කාලතුවක්කු තර්ජන මැඩපැවැත්වීම
මාවිල්ආරු පරාජයෙන් වියරු වැටුණු කොටි සංවිධානය, ත්‍රිකුණාමලය නාවික කඳවුරට සහ මුතූර් නගරයට පහර දුන්න ද ආරක්ෂක අංශ එය දැඩිව මැඩපැවැත්වීය. මුස්ලිම් වැසියන් පළවා හරිමින් ඔවුන් මුතූර් ප්‍රදේශය කාලතුවක්කු ප්‍රහාරක මධ්‍යස්ථානයක් කර ගත්හ. එහෙත් ත්‍රිකුණාමලය වරායට මරු කැඳවූ සාම්පූර් නගරය 2006 අගෝස්තු මාසයේ දී ද, දරුණු සටනකින් පසු සැප්තැම්බර් 04 වන දා මුතූර් නගරය ද අත්පත් කරගැනීමට හමුදාවට හැකි විය.

වාකරේ: මිනිස් පලිහක් මැදින් ගිය මානුෂීය මෙහෙයුම
මාස තුනකට ආසන්න කාලයක් පැවති අතිශය දුෂ්කර සටනකින් පසු, මඩකලපුව දිස්ත්‍රික්කයේ වාකරේ ප්‍රදේශය 2007 ජනවාරි 15 වන දා මුදාගැනීමට ආරක්ෂක අංශ සමත් විය. සිවිල් ජනතාව මිනිස් පලිහක් ලෙස යොදා ගනිමින් වාකරේ රෝහල පවා ත්‍රස්තවාදීන්ගේ කාලතුවක්කු අංගනයක් බවට පත් කර තිබීම මෙහිදී හමුදාවට මුහුණ දීමට සිදු වූ දැවැන්තම අභියෝගය විය.

කංචිකුඩිච්චිආරු: ත්‍රස්තවාදයේ සැඟවුණු කඳවුරු විනාශ කිරීම
ශ්‍රී ලංකා පොලිස් විශේෂ කාර්ය බලකායේ (STF) පෙරමුණ ගැන්මෙන් 2007 ජනවාරි පළමු සතියේ අම්පාර දිස්ත්‍රික්කයේ ක්‍රියාත්මක වූ මෙම මෙහෙයුමේදී, ජනක් බේස් ඇතුළු ප්‍රබල ත්‍රස්ත කඳවුරු 20ක් විනාශ කෙරිණි. එහිදී “Save the Children” සහ “ZOA Refugee Care” වැනි ජාත්‍යන්තර රාජ්‍ය නොවන සංවිධානවල නම් සඳහන් බෝට්ටු සහ උපකරණ ත්‍රස්ත රෝහල්වලින් හමුවීම, කොටි සංවිධානයට ජාත්‍යන්තරයෙන් ලැබුණු සහාය මනාවට හෙළිදරව් කළේය.

තොප්පිගල: නැගෙනහිරට උදා වූ නිදහසේ අරුණළු
1994 සිට ත්‍රස්තවාදීන්ගේ ග්‍රහණයේ පැවති, නැගෙනහිර ප්‍රධානතම පුහුණු මධ්‍යස්ථානය වූ තෝරාබෝරා කඳවුර පිහිටියේ තොප්පිගල ය. 2007 අප්‍රේල් 25 වන දා ආරම්භ වූ තොප්පිගල මෙහෙයුම, කමාන්ඩෝ බලසේනාධිපති බ්‍රිගේඩියර් චාගි ගාල්ලගේ ගේ අභීත මෙහෙයවීමෙන් යුතුව දෙවන කමාන්ඩෝ බලකාය සහ තවත් ප්‍රබල රෙජිමේන්තු කිහිපයක එකමුතුවෙන් ජයග්‍රහණය කෙරිණි. 2007 අගෝස්තු මාසය වන විට, 1977 න් පසු ප්‍රථම වතාවට සමස්ත නැගෙනහිර පළාතම ශ්‍රී ලංකා රජයේ පාලනයට නතු විය.

ජයග්‍රහණයේ අදිසි නියමුවෝ: නාවික, ගුවන් සහ රහසිගත මෙහෙයුම්
මෙම යුද ජයග්‍රහණය හුදෙක් ගොඩබිම් සටනක් පමණක්ම නොවීය.

▫️ නාවික හමුදාවේ ගැඹුරු මුහුදේ මෙහෙයුම්: ත්‍රස්තවාදීන්ගේ ජීවය බඳු වූ පාවෙන අවි ගබඩා නෞකා ජාත්‍යන්තර මුහුදු සීමාවේ දී (නාවික සැතපුම් 1000කටත් ඔබ්බෙන්) මුහුදුබත් කිරීමට නාවික හමුදාව සමත් විය.

▫️ ගුවන් හමුදාවේ ඉලක්කගත ප්‍රහාර: නියමුවන් රහිත ගුවන් යානා (UAV) සහ ප්‍රහාරක යානා හරහා සතුරු මර්මස්ථාන විනාශ කෙරිණි. 2007 නොවැම්බර් 02 දා කොටි දේශපාලන අංශ නායක තමිල්සෙල්වන් ඝාතනය කිරීම එහි තීරණාත්මක සංධිස්ථානයකි.

▫️ දිගුදුර විහිදුම් බලකාය (LRRP): සතුරු භූමිය අභ්‍යන්තරයටම රහසිගතව ඇතුළු වී ප්‍රබල කොටි නායකයින් ඉලක්ක කරමින්, ත්‍රස්තවාදීන්ගේ මානසිකත්වය බිඳ දැමීමට මෙම විශේෂ බලකාය සමත් විය.

වන්නි මෙහෙයුම: කොටි සංවිධානයේ හදවත පසාරු කිරීම
නැගෙනහිර මුදා ගැනීමේ සටනේ දී පියවරෙන් පියවර LTTE සංවිධානයට දැඩි පරාජයක් උරුම කර දුන් හමුදාව, ඉන්පසු උතුරු පළාත ද සේනාංක කිහිපයක් යොදාගනිමින් වට කර පහරදීමේ නිර්භීත යුද උපක්‍රමය දියත් කළේය. “ජයසිකුරු” මෙහෙයුම අසාර්ථක වීමට බලපෑ දුර්වලතා හඳුනාගෙන, පැති කිහිපයකින් සතුරාට පහර දීමේ සාර්ථක උපායමාර්ග භාවිත කිරීම LTTE පරාජයේ ප්‍රධානතම රහසක් විය.

ඒ පිළිබඳව වරෙක යුද හමුදාපති සරත් ෆොන්සේකා මෙලෙස ප්‍රකාශ කළේය:
“යුද්ධය ජයග්‍රහණය කළේ එක පැත්තක්වත් දුර්වල නොකරපු හේතුවෙන්. ආදී කාලයේ නැගෙනහිර සටන් කළොත් උතුර අත් හරිනවා. උතුරේ ක්‍රියාන්විතයක නියැළුණොත් නැගෙනහිර සියලු ප්‍රදේශ අත් හරිනවා. මෙහිදී අපි එක් පැත්තක්වත් දුර්වල වෙන්න දුන්නේ නෑ.”

ඒ අනුව නැගෙනහිර මෙහෙයුම් සිදු වන අතරතුර දීම, 2007 මාර්තු වන විට 57 වැනි සේනාංකය මේජර් ජෙනරාල් ජගත් ඩයස්‌ගේ නායකත්වයෙන් වන්නිය මුදා ගැනීම සඳහා මෙහෙයුම් ආරම්භ කර තිබිණි.

▫️ 57 වන සේනාංකය: මේජර් ජනරාල් ජගත් ඩයස්‌ගේ නායකත්වයෙන් මඩු පල්ලිය සහ මල්ලාවි නගරය මුදාගැනීම.
▫️ 59 වන සේනාංකය: බ්‍රිගේඩියර් නන්දන උඩවත්ත යටතේ වැලිඔයෙන් ආරම්භ කර වව්නියාවේදී ප්‍රථම කළු කොටි ගුවන් යානය විනාශ කිරීම.
▫️ 58 වන සේනාංකය: බ්‍රිගේඩියර් ශවේන්ද්‍ර සිල්වාගේ නායකත්වයෙන් වෙඩිතලතිව් සහ පරන්තන් නගරය මුදාගැනීම.

කිලිනොච්චිය: ප්‍රභාකරන්ගේ දවල් හීනය බොඳවීම
කොටි සංවිධානයේ ඊළාම් රාජ්‍යයේ යෝජිත අග නගරය වූ කිලිනොච්චිය හමුදාව අල්ලා ගැනීම “රාජපක්ෂගේ දවල් හීනයක්” බව ත්‍රස්ත නායක වේළුපිල්ලේ ප්‍රභාකරන් 2008 වසරේ “මහාවීර” දිනයේ දී පැවසීය. කොටි හිතවාදී විදෙස් සංවිධාන ද පැවසුවේ ආරක්ෂක හමුදාව කිලිනොච්චියට ඇතුළු වුවහොත් ස්‌ටලින්ග්‍රාඩයට ඇතුළු වූ ජර්මන් හමුදාවට අත්වූ ඉරණම අත්වනු ඇති බවයි.
එහෙත් ගුවන් හමුදාවේ ප්‍රබල ප්‍රහාර සහ 57 වැනි සේනාංකයේ අභීත මෙහෙයුම් හමුවේ 2009 ජනවාරි 02 වන දින කිලිනොච්චි නගරය මුදාගැනීමට යුද හමුදාව සමත් විය.

මුලතිව් නගරය මුදාගැනීම
වසර 13ක් පුරා (1996 සිට) ත්‍රස්තග්‍රහණයේ පැවති මුලතිව් නගරය 59 වන සේනාංකය විසින් අත්පත් කරගනු ලැබීය. පනස් දහසක පමණ හමුදාවක් වන්නිය සෑම පැත්තකින්ම ආක්‍රමණය කරන විට, 2009 අප්‍රේල් 05 වන දින පුදුකුඩුඉරිප්පු ආන්දපුරම් සටනේදී ත්‍රස්ත නායක තීපන්, විදූෂා, කීර්ති ඇතුළු කොටි සාමාජිකයන් 625 දෙනෙක්‌ මරණයට පත් වූහ. මෙම දැවැන්ත පරාජයත් සමඟ LTTE නායකයන් පුදුමාතලන් දක්වා පලා ගියහ.

නන්දිකඩාල් කලපුව: ත්‍රස්තවාදයේ අවසන් සුසුම
අන්ත පරාජයට පත්ව පුදුමාතලන් යුද මුක්ත කලාපයට කොටු වූ කොටි නායකයින්, ලක්ෂ සංඛ්‍යාත සිවිල් වැසියන් මිනිස් පලිහක් කර ගත්හ. එහෙත් 2009 අප්‍රේල් 20 වන දා, ලෝක ඉතිහාසයේ දැවැන්තම ප්‍රාණ ඇපකරුවන් මුදාගැනීමේ මෙහෙයුම ක්‍රියාත්මක කරමින්, සිවිල් වැසියන් 128,000කට ආසන්න පිරිසකගේ ජීවිත බේරා ගැනීමට කමාන්ඩෝ සහ විශේෂ බලකායන් සමත් විය.

අවසානයේ, 2009 මැයි 19 වන දා උදෑසන, කිසිදා පරාජය කළ නොහැකි යැයි පුරසාරම් දෙඩූ වේළුපිල්ලේ ප්‍රභාකරන්ගේ මළ සිරුර නන්දිකඩාල් කලපුවෙන් සොයාගැනීමත් සමඟ, දශක තුනක් පුරා ඇදී ගිය රුධිර ගංගාව නිමා විය. ත්‍රස්තවාදයක් යුදමය වශයෙන් පරාජය කළ ලොව ප්‍රථම සහ එකම රට ලෙස ශ්‍රී ලංකාව ඉතිහාසගත විය.

ජාතියේ ප්‍රණාමය
මෙම මහා විජයග්‍රහණයේ නියමුවන්ට සමස්ත ජාතියේම ප්‍රණාමය හිමි විය යුතුය:

▫️ දේශපාලන හා ආරක්ෂක නායකත්වය: ජනාධිපති මහින්ද රාජපක්ෂ සහ ආරක්ෂක ලේකම් ගෝඨාභය රාජපක්ෂ
▫️ යුද හමුදාපති: ලුතිනන් ජෙනරාල් සරත් ෆොන්සේකා
▫️ නාවික හමුදාපති: වයිස් අද්මිරාල් වසන්ත කරන්නාගොඩ
▫️ ගුවන් හමුදාපති: එයාර් වයිස් මාෂල් රොෂාන් ගුණතිලක
▫️ සිවිල් ආරක්ෂක බලකායේ අධ්‍යක්ෂ ජනරාල්: රියර් අද්මිරාල් සරත් වීරසේකර
▫️ පොලිස්පති: ජයන්ත වික්‍රමරත්න
▫️ අභීත සේනාංකාධිපතිවරුන්: මේජර් ජනරාල් කමල් ගුණරත්න (53), මේජර් ජනරාල් ජගත් ඩයස් (57), බ්‍රිගේඩියර් ප්‍රසන්න සිල්වා (55), බ්‍රිගේඩියර් ශවේන්ද්‍ර සිල්වා (58), බ්‍රිගේඩියර් නන්දන උඩවත්ත (59).

එමෙන්ම, ජාතියේ නිදහස වෙනුවෙන් සිය උත්තරීතර ජීවිතය පූජා කළ සහ සදාකාලිකවම ආබාධිත වූ දහස් සංඛ්‍යාත රණවිරුවනි, ඔබ ජාතියට කළ මෙහෙය අප්‍රමාණ ය.

අද වන විට ඇතැමුන්ට මේ රටේ කුරිරු යුද්ධයක් පැවති බව අමතක වී යාම බලවත් ඛේදවාචකයකි. ඔබේත්, මගේත්, මතු පරපුරේත් නිදහස වෙනුවෙන් රණවිරුවන් හෙලූ රුධිරය සහ කඳුළු කිසිදාක අප අමතක නොකළ යුතුය.
දෙමළ ජාතික සංවිධාන, ඩයස්පෝරාව, ඇතැම් බටහිර රටවල් සහ විවිධ අදිසි බලවේග අදටත් මේ රට තුළ ඊළාම් රාජ්‍යයක් පිහිටුවීමේ සිහිනය අතහැර නැත. ආයුධයෙන් දිනාගත නොහැකි වූ ඊළාමය, පෑන් පහරකින් හෝ ලබාගැනීමට ඇතැම් දේශපාලනඥයන්ගේ ද සහාය ඇතිව ඔවුන් තවමත් මාන බලමින් සිටිති.
නැවත වතාවක් ඊළාම් සිහිනයක් වෙනුවෙන් අඩිතාලම දමන්නේ නම්, ප්‍රභාකරන්ට නන්දිකඩාල් හිදී අත්වූ ඉරණමට ද එහා ගිය අතිශය භයානක අවසානයකට ඔවුන්ට මුහුණ දීමට සිදුවන බව තරයේ සිහිපත් කරමි.

සටහන: Malith Induranga