කොස් ගෙඩියක් කැඩීම සම්බන්ධයෙන් ඇති වූ ආරවුලක් හේතුවෙන් පියෙකු විසින් යකඩ පොල්ලකින් පහරදී සිය දියණිය ඝාතනය කිරීමේ පුවතක් කළුතර උතුර ප්රදේශයෙන් වාර්තා වෙනවා.
අප වාර්තාකරු සඳහන් කළේ, මෙසේ අවාසනාවන්ත ලෙස මියගොස් ඇත්තේ කළුතර උතුර බෝසිරිපුර පදිංචිව සිටි 35 හැවිරිදි දිලිනි මධුෂිකා නමැති එක්දරු මවක බවයි.
පොලිසිය පවසන පරිදි දියණිය සහ පියා යාබද නිවෙස්වල පදිංචිව සිට ඇති අතර, ඔවුන් අතර කලක පටන් පැවති පවුල් ආරවුලක් හේතුවෙන් දියණිය සිය නිවසින් තාවකාලිකව ඉවත්ව ගොස් තිබෙනවා.
ඊයේ (04) පෙරවරුවේ පියා විසින් දියණිය පදිංචිව සිටි ඉඩමේ කොස් ගසකින් ගෙඩියක් කඩා ඇති බවත්, ඒ පිළිබඳව අසල්වැසියෙකු දියණියට දුරකථනයෙන් දැනුම් දී ඇති අතර, එම පුවත සැලවීමත් සමග දියණිය යතුරුපැදියකින් අදාළ ස්ථානයට පැමිණ ඒ පිළිබඳව විමසා තිබෙනවා.
එහිදී ඇති වූ බහින්බස් වීමක් දුරදිග යාමෙන් පියා යකඩ පොල්ලකින් ඇයට පහර දී ඇති බවයි පොලිස් විමර්ශනවලදී අනාවරණය වී ඇත්තේ.
බරපතල තුවාල ලැබූ ඇය ප්රදේශවාසීන්ගේ සහාය ඇතිව කළුතර නාගොඩ ශික්ෂණ රෝහලේ දැඩි සත්කාර ඒකකයට ඇතුළත් කර ප්රතිකාර ලබමින් සිටියදී ජීවිතක්ෂයට පත්ව තිබෙනවා.
පහරදීම සිදුකළ පියා කළුතර උතුර පොලිසිය විසින් අත්අඩංගුවට ගෙන ඇති අතර, අපරාධයට යොදාගත් යකඩ පොල්ල ද පොලිස් භාරයට ගෙන තිබෙනවා.
