“ද්වන්ධ – DUET” ශ්‍රී ලාංකේය නවීන චිත්‍ර කලාවේ අර්ථවත් හමුවක්.

“ද්වන්ධ – DUET”
කලා හඬ දෙකක් එකම අවකාශයක හමුවන විශේෂ කලා සංවාදයක්.

ශ්‍රී ලාංකීය නවීන චිත්‍ර කලාවේ අර්ථවත් මංසන්ධියකදී, කලා රසිකයන්ට ගැඹුරු අත්දැකීමක් පිරිනමමින් “ද්වන්ධ – DUET” චිත්‍ර ප්‍රදර්ශනය වේදිකාවට පැමිණෙයි. මෙය සරලවම චිත්‍ර එකතුවක් නොව, දිනේෂ් පෙරේරා සහ නාමලී රියල් යන කලාකරුවන් දෙදෙනාගේ වෙනස්, එහෙත් එකිනෙකට අර්ථ දෙන කලා භාෂා අතර සිදුවන සංවාදයකි.

“ද්වන්ධ” යන නාමයම පෙන්වා දෙන පරිදි, මෙය විරුද්ධතා දෙකක් අතර ගැටුමක් ලෙස පමණක් නොව, සමාන්තර ලෝක දෙකක් අතර ගැඹුරු කලාත්මක සම්බන්ධතාවයක් ලෙසද විවරණය කළ හැක. මනුෂ්‍ය හැඟීම්, ආදරය, සමීපතාවන්, සිහින, අභ්‍යන්තර Selfඑක සහ සමාජය අතර ඇති සංකීර්ණ සබඳතා මෙම ප්‍රදර්ශනය තුළ විවිධ ආකාරයෙන් නිරූපණය වෙයි.

ශ්‍රී ලංකාවේ නවීන චිත්‍ර කලාවේ ප්‍රමුඛ නාමයක් වන දිනේෂ් පෙරේරාගේ කලා ලෝකය, වර්ණ, හැඩතල සහ මනුෂ්‍ය සම්බන්ධතා හරහා ගොඩනැගී ඇත. පේරාදෙණිය සරසවි උයන විද්‍යාලය සහ ඩී.එස්. සෙනානායක විදුහලෙන් ආරම්භ වූ ඔහුගේ කලා ගමන, ජාතික කලා භවන තුළ ධර්මසිරි කරියවසම් මහතාගේ මගපෙන්වීම යටතේ පෝෂණය වූයේය.

දිනේෂ්ගේ කෘති තුළ ආදරය, කරුණාව, ලිංගිකත්වය, සමීපතාව සහ මිනිසා, සත්වයා පක්ෂියා අතර ඇති සම්බන්ධතා සජීවීව දිස් වේ. ඔහු භාවිත කරන වර්ණ ප්‍රබලය, ඒ තුළ සැඟවුණු සංවේදීත්වය නරඹන්නාගේ සිත සෘජුවම ස්පර්ශ කරයි. දේශීය වගේම විදේශයන් තුළත් ඔහුගේ කෘති ප්‍රසිද්ධිය,එය ඔහුගේ කලා හඬේ ශක්තිය මනාව පිළිඹිඹු කරයි.

නාමලී රියල්ගේ කලා ලෝකය, යථාර්ථය සහ සිහින අතර ඇති සියුම් බව ඉක්මවා යයි. ඇය විසින් සංකල්පනය කළ “Dreamscape” යන කලා ප්‍රභේදය, සිහින, මනස සහ අභ්‍යන්තර Self එක පිළිබඳ ගැඹුරු විමසුමකි. Jungian මනෝවිද්‍යාව, ලෝක ආගම්, පුරාණ කථා සහ රටවල් 22ක් පුරා ලැබූ ජීවිත අත්දැකීම්, ඇයගේ කලා භාෂාව හැඩගස්වා ඇත.

Dreamscape චිත්‍රයක් නරඹන විට, නරඹන්නාගේම සිත පිළිබිඹු කරයි. ඒ නිසාම බොහෝ කෘති නාම රහිතය. නාමලීගේ අදහසට අනුව, චිත්‍රයක අර්ථය තීරණය වන්නේ කලාකරුවා විසින් නොව, නරඹන්නාගේ අත්දැකීමෙන්ය. USA, යුරෝපය සහ ආසියාව පුරා ඇයගේ කෘතිවලට ලැබෙන පිළිගැනීම, මෙම සුවිශේෂී කලා භාෂාවේ විශ්වීයත්වය පෙන්වයි.

“ද්වන්ධ – DUET” ප්‍රදර්ශනයේ විශේෂත්වය වන්නේ, දිනේෂ් පෙරේරාගේ බාහිර ලෝකය හා සම්බන්ධ මනුෂ්‍යත්වයෙන් පිරි වර්ණවත් කලා හඬ, නාමලී රියල්ගේ අභ්‍යන්තර ලෝකයට ගමන් කරන සිහිනමය Dreamscape භාෂාව සමඟ එකම අවකාශයක හමුවීමයි.

මෙය විරුද්ධතා දෙකක් අතර තරඟයක් නොව, එකිනෙකට අර්ථ දෙන, එකිනෙකට ප්‍රශ්න කරන සහ අවසානයේ එකිනෙකට සම්පූර්ණ වන කලා සංවාදයක් ලෙස හැඳින්විය හැක. නරඹන්නාට මෙය චිත්‍ර නරඹන අත්දැකීමක් පමණක් නොව, තමන්ගේම හැඟීම්, සිහින සහ Self එක පිළිබඳ නැවත සිතීමට හේතු වන ගමනකි.

“ද්වන්ධ – DUET” යනු, ශ්‍රී ලාංකීය නවීන චිත්‍ර කලාව තුළ කලා හඬ ද්විත්වයක් හමුවන, අපූරු චිත්‍ර කලා දැක්මකි.

ප්‍රදර්ශනය: ද්වන්ධ – DUET
කලාකරුවන්: Namalee Real & Dinesh Perera
දිනයන්: 2025 දෙසැම්බර් 23 සිට 2026 ජනවාරි 3 දක්වා
වේලාව: පෙ.ව. 10.00 – රා. 8.00
ස්ථානය:
Dinesh Perera Art Gallery
No. 1458 B, Suriya Mawatha,
Kalapaluwawa Road,
Koswatta, Battaramulla
විමසීම් / WhatsApp: 072 8357856