ශ්රී ලංකා පොදුජන පෙරමුණ විසින් දිවයින පුරා ක්රියාත්මක කරනු ලබන පළාත් පාලන කොට්ඨාස ජනහමු මාලාවේ තවත් වැදගත් අදියරක් ලෙස ගම්පහ දිස්ත්රික්කයේ බියගම සහ වත්තල ආසනවල ජනහමු 06 වන දින පැවැත්විණි. පක්ෂයේ ප්රාදේශීය සංවිධාන ශක්තිමත් කිරීම, ක්රියාකාරී ජාලය පුළුල් කිරීම සහ ඉදිරි දේශපාලන වැඩපිළිවෙළ පිළිබඳ ජනතාව දැනුවත් කිරීම අරමුණු කරගනිමින් මෙම ජනහමු සංවිධානය කර තිබුණි.
බියගම ආසන සංවිධායක අජිත් කුමාර සහ වත්තල ආසන සංවිධායක ජයතිස්ස රුද්රිගෝ මඟපෙන්වීම සහ නායකත්වය යටතේ මෙම වැඩසටහන් සාර්ථකව සංවිධානය කර තිබූ අතර, ප්රදේශවාසී ජනතාවගේ උනන්දුවෙන් හා ක්රියාකාරී සහභාගීත්වයෙන් එම ජනහමු උණුසුම් දේශපාලන වාතාවරණයක් මධ්යයේ පැවැත්විණි.
බියගම ප්රදේශයේ පැවති ජනහමුව සියඹලාපේ උතුර කොට්ඨාස සංවිධායක හා බියගම ප්රාදේශීය සභා මන්ත්රී වසන්ත වික්රමරත්න විසින් සංවිධානය කර තිබූ අතර, වත්තල ප්රදේශයේ පැවති ජනහමුව පුබුදුගම කොට්ඨාස සංවිධායක හා වත්තල ප්රාදේශීය සභා මන්ත්රී තුෂාර සම්පත්ගේ සංවිධානත්වයෙන් පැවැත්විණි. ප්රදේශීය ජනතාව සමඟ සෘජු සම්බන්ධතාවය ගොඩනඟා ගනිමින් පක්ෂයේ ඉදිරි වැඩපිළිවෙළ පිළිබඳ දැනුවත් කිරීම මෙහිදී සිදු කෙරිණි.
මෙම අවස්ථාවන් සඳහා ශ්රී ලංකා පොදුජන පෙරමුණේ ජාතික සංවිධායක පා.ම නාමල් රාජපක්ෂ මෙහෙයුම් ප්රධානී හිටපු අමාත්ය ජොන්ස්ටන් ප්රනාන්දු , හිටපු රාජ්ය අමාත්යවරුන් වන ගම්පහ දිස්ත්රික් නායක ඉන්දික අනුරුද්ධ සහ ප්රසන්න රණවීර ද මෙම ජනහමු සඳහා එක්විය.
එහිදී අදහස් දැක්වූ පක්ෂ නායකයින්, පළාත් පාලන මට්ටමේ දේශපාලන සංවිධාන ශක්තිමත් කිරීමේ වැදගත්කම අවධාරණය කළ අතර, ජනතාව සමඟ සමීපව කටයුතු කරමින් ප්රදේශීය ගැටලු සඳහා විසඳුම් ලබාදීමට ශ්රී ලංකා පොදුජන පෙරමුණ කැපවී සිටින බවද ප්රකාශ කළහ.
තවද, වත්මන් දේශපාලන තත්ත්වය, ආර්ථික අභියෝග සහ ජනතාව මුහුණදෙන ගැටලු පිළිබඳවද මෙහිදී දීර්ඝ ලෙස සාකච්ඡා කෙරුණු අතර, ඉදිරි මැතිවරණ සහ පක්ෂ ප්රතිසංවිධාන කටයුතු සම්බන්ධයෙන්ද ක්රියාකාරීන් දැනුවත් කිරීමට පියවර ගෙන තිබුණි.
මෙම ජනහමු සඳහා සියඹලාපේ උතුර සහ පුබුදුගම කොට්ඨාසවල පක්ෂ ක්රියාකාරීන්, ප්රාදේශීය නායකයින් සහ ප්රදේශවාසීන් විශාල පිරිසක් සහභාගී වූ අතර, පක්ෂයට සහාය පළකරමින් උද්යෝගිමත් වාතාවරණයක් නිර්මාණය වී තිබුණි.
ශ්රී ලංකා පොදුජන පෙරමුණ විසින් දිවයින පුරා මෙවැනි ජනහමු මාලාවක් ක්රියාත්මක කරමින් පක්ෂ සංවිධාන ශක්තිමත් කිරීමට සහ ජනතාව සමඟ සමීප සබඳතා තවදුරටත් වර්ධනය කිරීමට කටයුතු කරමින් සිටින බව දේශපාලන ආරංචි මාර්ග සඳහන් කරයි.
