මුදල් අමාත්යාංශ ලේකම් ආචාර්ය හර්ෂණ සූරියප්පෙරුම මහතා පාර්ලිමේන්තුවට නොපැමිණෙන්නේ නම් ඔහුට පාර්ලිමේන්තු යාන්ත්රණය හරහා දඬුවම් කිරීමට මුදල් කමිටු සභාපති හර්ෂ ද සිල්වා මහතාට බලය පවතින බව ෆ්රී ලෝයර්ස් සංවිධානය පවසයි.
එම සංවිධානය වෙනුවෙන් නිවේදනයක් නිකුත් කරමින් හිටපු ආණ්ඩුකාර රංජිත් කිර්ති තෙන්නකෝන් මහතා පවසන්නේ, පාර්ලිමේන්තු මුදල් කමිටුව පිහිටුවා ඇත්තේ 2022 වසරේදී සම්මත කරන ලද පාර්ලිමේන්තු ස්ථාවර නියෝග 121 යටතේ බවය.
පාර්ලිමේන්තු ස්ථාවර නියෝග කිසියම් අයෙකු විසින් උල්ලංඝනය කරන්නේ නම් ඒ පිළිබඳව දඬුවම් ලබාදීමට පාර්ලිමේන්තු බලතල හා වරප්රසාද පනත යටතේ ප්රතිපාදන සපයා ඇති බව එම නිවේදනයේ සඳහන් වේ.
ඒ අනුව මුදල් කමිටුවට ඕනෑම අයෙකු කැඳවීමට එහි සභාපතිවරයාට බලය ඇති අතර එසේ කැඳවීමකට නොපැමිණෙන්නේ නම් ඒ සම්බන්ධයෙන් ගත යුතු පියවර සහ දඬුවම් බලපතල සහ වරප්රසාද පනතේ දක්වා ඇති අතර එම වරදවලට පාර්ලිමේන්තුව විසින් හෝ ශ්රේෂ්ඨාධිකරණය මඟින් දඬුවම් කළ හැකි බව රංජිත් කීර්ති තෙන්නකෝන් මහතා පවසයි.
මේ සඳහා ශ්රේෂ්ඨාධිකරණය මඟින් අවුරුදු දෙකක් නොඉක්මවන කාලයකට බන්ධනාගාර ගත කිරීම හෝ දඩයක් නියම කිරීම හෝ දඩය හා බන්ධනාගාර ගත කිරීම යන දඬුවම් දෙකටම යටත් කළ හැකි බව ද ඔහු සඳහන් කරයි.
ඒ අනුව හර්ෂ ද සිල්වා සභාපතිවරයා ලෙස මුදල් කමිටුවට පැමිණීමට දැනුම් දී ඇති ඕනෑම අයෙකු එදිනට නොපැමිණෙන්නේ නම් ඔහුට පාර්ලිමේන්තු බලතල හා වරප්රසාද පනත යටතේ කටයුතු කළ හැකි වේ.
ඉතිහාසයේ කිසිදු රජයක් පාර්ලිමේන්තුවේ මුදල් පිළිබඳ වගකීම මෙලෙස අභියෝගයට ලක් කර පාර්ලිමේන්තු කමිටු සතු බලතල හෑල්ලුවට ලක්කර නොමැති බව ද අදාළ නිවේදනයේ සඳහන්ය.
මුදල් කමිටුවට පැමිණීමට දැනුම්දී තිබියදීත් යම් අයෙකු නොපැමිණෙන්නේ නම් කමිටු සභාපතිවරයා ඉල්ලා අස්වීම හෝ දඬුවම් කිරීම යන තෝරාගැනීම් දෙකෙන් එකක් සිදුකර පාර්ලිමෙන්තුවේ ගෞරවය හා අභිමානය රැකගත යුතු බව රංජිත් කීර්ති තෙන්නකෝන් මහතා සිය ලිපිය මඟින් වැඩිදුරටත් පෙන්වා දී ඇත.
මුදල් අමාත්යාංශ ලේකම් ආචාර්ය හර්ෂණ සූරියප්පෙරුම මහතා මුදල් පිළිබඳ කාරක සභාව හමුවට නොපැමිණෙන බවට තමාට දැනුම්දුන් බව කමිටු සභාපති ආචාර්ය හර්ෂ ද සිල්වා මහතා ඊයේ (29) ප්රකාශ කළේය.
විදෙස් ණයක් ගෙවීම සඳහා මහභාණ්ඩාගාරයේ තිබූ අමෙරිකානු ඩොලර් මිලියන 2.5ක මුදලක් බාහිර පාර්ශවයක් අතට පත්වීමේ සිද්ධියට අදාළව කරුණු විමසීම සඳහා මුදල් අමාත්යාංශ ලේකම්වරයා හට අද (30) දිනයේ මුදල් පිළිබඳ කාරක සභාව හමුවේ පෙනී සිටින ලෙස දැනුම්දී තිබුණි.
කෙසේවෙතත් අද දිනයේ තමාට අදාළ කමිටුව හමුවට පෙනී සිටීමට නොහැකි බව දන්වමින් මුදල් අමාත්යාංශ ලේකම් ආචාර්ය හර්ෂන සූරියප්පෙරුම මහතා විසින් තමාට ලිපියක් මඟින් දැනුම් දුන් බව ආචාර්ය හර්ෂ ද සිල්වා මහතා පැවසුවේය.
මේ අතර අපරාධ පරීක්ෂණ දෙපාර්තමේන්තුව මඟින් අදාළ සිද්ධිය සම්බන්ධයෙන් සිදුකෙරෙන විමර්ශන පිළිබඳ විශ්වාසයක් තැබිය නොහැකි බව ෆ්රී ලෝයර්ස් සංවිධානයේ සාමාජික මෛත්රී ගුණරත්න මහතා පැවසුවේය.
අදාළ සිදුවීම සම්බන්ධයෙන් ඊයේ (29) රාත්රී ටීවි දෙරණ ඔස්සේ විකාශය වු අලුත් පාර්ලිමේන්තුවට වැඩසටහනට එක්වෙමින් ඩිජිටල් ආර්ථික නියෝජ්ය අමාත්ය එරංග වීරරත්න මහතා පල කළේ මෙවන් අදහසක්.
“මේකට හැකර්වරයෙකු සම්බන්ධයක් කියලා ඍජු නිගමනයක් තාම ඇවිල්ලා නෑ. ඒ සම්බන්ධයෙන් තවදුරටත් පරීක්ෂා කරලා බලන්න ඔ්නේ. දැන් අපිට නිගමනය කරලා කියන්න පුළුවන් පිටරට තියෙන ආයතනය විදියටම ඩොමේන් එකක් හදාගෙන එවැනි පුද්ගලයින්ගේ නම් හා ඊමේල් ආකෘතියත් සමානයි. නොසැලකිල්ලක් තියෙනවා. බැහැර කරන්න අවශ්ය නෑ. ප්රශ්නය තියෙන්නේ වෙන ආයතනයක් හරහා ආව ඊමේල් එක නිසා තමා මේක වෙලා තියෙන්නේ.”
වත්මන් ආණ්ඩුවේ ද දූෂිතයින් සිටින්නේ නම් ඔවුන්ට එරෙහිව තරාතිරම නොබලා නීතිය ක්රියාත්මක කරන බව නියෝජ්ය අමාත්ය රුවන් රණසිංහ මහතා සඳහන් කළේය.
