උතුරු කොරියාව සිය නැගෙනහිර මුහුදු තීරය දෙසට බැලස්ටික් මිසයිල කිහිපයක් දියත් කර ඇති බව දකුණු කොරියාව සහ ජපානය අද (19) පැවසූ බව රොයිටර්ස් පුවත් සේවය පවසනවා.
මෙය උතුරු කොරියාව සිය යුද ශක්තිය ඉහළ නැංවීම සඳහා මෑත කාලීනව සිදුකරන අඛණ්ඩ මිසයිල පරීක්ෂණ මාලාවක තවත් එක් පියවරක්.
මෙය මෙම වසර තුළ උතුරු කොරියාව සිදුකළ හත්වන බැලස්ටික් මිසයිල දියත් කිරීම වන අතර, අප්රේල් මාසය තුළ පමණක් සිදුකළ සිව්වන පරීක්ෂණයයි.
විශ්ලේෂකයින් පවසන්නේ අමෙරිකාව මේ වන විට ඉරානය කෙරෙහි වැඩි අවධානයක් යොමු කර ඇති බැවින්, සිය න්යෂ්ටික සහ මිසයිල හැකියාවන් ඉහළ නැංවීමට උතුරු කොරියාව මෙය “රන්මය අවස්ථාවක්” කරගෙන ඇති බවයි.
දකුණු කොරියානු හමුදාවට අනුව, අද උදෑසන 6:10 ට පමණ උතුරු කොරියාවේ නැගෙනහිර වෙරළ තීරයේ ‘සින්පෝ’ (Sinpo) නගරය අසල සිට මෙම මිසයිල දියත් කර තිබෙනවා.
ජපාන රජය සඳහන් කරන්නේ මෙම මිසයිල කොරියානු අර්ධද්වීපයට ඔබ්බෙන් වූ මුහුදට වැටී ඇති බවට විශ්වාස කරන අතර ජපානයේ සුවිශේෂී ආර්ථික කලාපයට ඉන් බලපෑමක් වී නොමැති බවයි.
මෙම පරීක්ෂණ එක්සත් ජාතීන්ගේ ආරක්ෂක මණ්ඩලයේ යෝජනා උල්ලංඝනය කිරීමක් වුවද, උතුරු කොරියාව පවසන්නේ එය තම ස්වයං ආරක්ෂාව සඳහා ඇති අයිතියක් බවයි.
මැයි මස මැද භාගයේදී අමෙරිකානු ජනාධිපති ඩොනල්ඩ් ට්රම්ප් සහ චීන ජනාධිපති ෂී ජින්පින් අතර පැවැත්වීමට නියමිත සමුළුවේදී උතුරු කොරියානු අර්බුදය පිළිබඳව සාකච්ඡා කිරීමට නියමිතව තිබියදී මෙම ප්රහාර දියත් කිරීම විශේෂත්වයක්.
පසුගිය බදාදා ජාත්යන්තර පරමාණුක බලශක්ති ඒජන්සියේ ප්රධානී රෆායෙල් ග්රොසි පෙන්වා දුන්නේ, උතුරු කොරියාව න්යෂ්ටික අවි නිෂ්පාදනය සම්බන්ධයෙන් ඉතා බරපතල ප්රගතියක් ලබා ඇති බවයි.
මාර්තු අග භාගයේදී කිම් ජොන් උන් ප්රකාශ කර සිටියේ උතුරු කොරියාව න්යෂ්ටික සන්නද්ධ රාජ්යයක් වීම ආපසු හැරවිය නොහැකි කරුණක් බවයි.
