හිටපු මැති ඇමති පක්ෂ නායකයන් 30 කට වැඩි පිරිසක් අද ශ්රී ලංකා පොදු ජන පෙරමුණේ විශේෂ සාකච්ඡාවක.
ශ්රී ලංකා පොදුජන පෙරමුණ හැර ගොස් පසුගිය ආණ්ඩුව සමග එක්ව කටයුතු කළ හිටපු ඇමතිවරු සහ දේශපාලන පක්ෂ නායකයින් සමඟ විශේෂ සාකච්ඡාවක් ශ්රී ලංකා පොදු ජන පෙරමුණේ ජාතික සංවිධායක පාර්ලිමේන්තු මන්ත්රී නාමල් රාජපක්ෂ මහතාගේ ප්රධානත්වයෙන් අද (04) පැවැත්වේ.
ශ්රී ලංකා පොදුජන පෙරමුණේ පක්ෂ කාර්යාලයේදී අද පැවැත්වෙන මෙමසාකච්ඡාවට හිටපු ඇමතිවරු 30 කට වැඩි පිරිසක් සහ පක්ෂ නායකයින් හා නියෝජිතයින් එක්වීමට නියමිතය.
ඉදිරියේ පැවැත්වෙන ඕනෑම මැතිවරණයක් ජයග්රහණය කිරීමට හැකිවන පරිදි පක්ෂය සූදානම් කිරීමේ වැඩපිළිවෙළේ එක් පියවරක් ලෙස මෙම සාකච්ඡා පැවැත්වෙන බව ශ්රී ලංකා පොදු ජනපෙරමුණේ මාධ්ය ප්රකාශක සංජීව එදිරිමාන්න මහතා පැවසීය.
විවිධ පාර්ශ්වයන් සමඟ මෙවැනි සාකච්ඡා ගණනාවක් ඉදිරියේදී පැවැත්වීමට සැලසුම් කර තිබෙන බවද ඒ මහතා සඳහන් කළේය.
මේ වන විට ලංකා පොදු ජන පෙරමුණ හැර ගියපිරිස් මෙන්ම ඉතිහාසයේ කිසිදු දිනක පක්ෂය සමග එක් නොවූ පිරිස් අද ඒකරාශී වෙමින් තිබෙන බවත් පවසන එදිරිමාන්න මහතා ඉදිරි කෙටි කාලය තුළ ඒ සියලු බලවේග නාමල් රාජපක්ෂ මහතා ප්රමුඛ ශ්රී ලංකා පොදුජන පෙරමුණ වටා ගොනු කිරීම වෙනුවෙන් අද පක්ෂයේ සියලු දෙනා කැපව කටයුතු කරන බව සිහිපත් කළේය.
ජාතික ජන බලවේගය බලයට පත්වීමට පෙර ජනතාවට ලබා දුන් සුරංගනා පොරොන්දු කිසිවක් ඉටු නොකිරීම හමුවේ ජනතාව අද දැඩි පීඩාවන්ට පත්ව සිටින බවත් මේ විනාශකාරී පාලනයෙන් රටත් ජනතාවත් මුදා ගත හැක්කේ ශ්රී ලංකා පොදු ජන පෙරමුණටබව ඒ මහතා වැඩිදුරටත් පැවසීය.
