වතුකරයේ ජනතාවගේ ආරක්ෂාව, ඉඩම් අයිතිය සහ අනෙකුත් ජාතීන්ට හිමි සමාන අයිතිවාසිකම් ලබාදෙන ලෙස බල කරමින් සිවිල් ක්රියාකාරීන් පිරිසක් අද (03) හැටන් නගරයේදී විරෝධතාවයක නිරත වුණා.
අප වාර්තාකරු පැවසුවේ, කඳුරට ජනතා පෙරමුණ විසින් සංවිධානය කරන ලද මෙම විරෝධතාවය “ගැහුවොත් ගහනවා, ඉවසුවා ඇති” යන සටන් පාඨය පෙරදැරි කරගනිමින් පැය තුනකට ආසන්න කාලයක් පුරා පැවති බවයි.
රත්නපුර, කහවත්ත ප්රදේශයේ පෞද්ගලික වතු සමාගමකට අයත් නීළගම වතුයායේ වතු කම්කරුවන් විසින් ඉදිකරන ලද තාවකාලික නිවාස එම සමාගමේ ආරක්ෂක නිලධාරීන් විසින් කඩා විනාශ කිරීමේ සිද්ධිය මෙම විරෝධතාවයට මූලික හේතුව වී තිබෙනවා.
විරෝධතාවයට එක්වූ ක්රියාකාරීන් වැඩිදුරටත් අදහස් දක්වමින් කියා සිටියේ, වතුකරය තුළ මෙවැනි සිදුවීම් තවදුරටත් වීමට ඉඩ නොදෙන බවයි.
එළඹෙන (05) වනදා වතුකරයේ තරුණ ප්රජාව ඒකරාශී කරගනිමින් පාර්ලිමේන්තුව ඉදිරිපිටදී මෙවැනිම විරෝධතාවක් පවත්වන බවද සිවිල් ක්රියාකාරීන් මෙහිදී වැඩිදුරටත් ප්රකාශ කළ බව අප වාර්තාකරු පවසනවා.
