ඉකුත් අලුත් අවුරුදු සමයේ අනුරාධපුරයේ සිට කොළඹ බලා ධාවනය වෙමින් තිබූ පෞද්ගලික බස්රථයක ගමන් කරමින් සිටි ශ්රී ලංකා යුද හමුදාවේ හිටපු සෙබළියන් තිදෙනෙකුට මත්වන සුළු බීම වර්ගයක් පානය කිරීමට ලබාදී සිහිසුන්කොට එම හිටපු හමුදා සෙබළියන් තිදෙනා පැළඳ සිටි රුපියල් ලක්ෂ 17 ක පමණ වටිනාකමකින් යුත් රණ් භාණ්ඩ කොල්ලකෑමේ සිද්ධියක් සම්බන්ධයෙන් අනුරාධපුර මූලස්ථාන පොලිසියේ අපරාධ විමර්ශන අංශය මගින් අත්අඩංගුවට ගෙන අධිකරණය හමුවට ඉදිරිපත් කළ සැකකරුවෙකු මේ මස 29 දක්වා රක්ෂිත බන්ධනාගාර ගතකර තිබෙනවා.
මෙම සැකකරු විසින් දිවයිනේ තවත් විවිධ ප්රදේශවල සිදුකර ඇති බව කියන මෙවැනිම සංවිධානාත්මක ජාවාරම් සම්බන්ධයෙන් විමර්ශන මෙහෙයවා එම විමර්ශනවල ප්රගතිය දැක්වෙන වාර්තාවක් අධිකරණයට ඉදිරිපත් කරන ලෙසට අධිකරණය නියෝග කරනු ලැබුවා.
මෙසේ රිමාන්ඩ් බන්ධනාගාර ගත කළේ සාලියවැව ප්රදේශයේ පදිංචි දෙදරු පියෙක්.
මෙම සැකකරු අධිකරණයට ඉදිරිපත් කරමින් අනුරාධපුර මූලස්ථාන පොලිසිය කියා සිටියේ පසුගිය අලුත් අවුරුදු සමයේ දිනයකදී අනුරාධපුරයේ සිට ඇල්ල මාර්ග ඔස්සේ කොළඹ දක්වා ධාවනය වෙමින් තිබූ පෞද්ගලික බස්රථයක පිටුපස අසුනේ පැමිණිලිකාර කානාතාවන් තිදෙනා සහ මෙම සැකකරු ගමන් කොට ඇති බවයි.
එහිදි තමන් නාවික හමුදාවේ සේවය කරන නිලධාරියෙකු බව අදාල කාන්තාවන්ට තමන් හදුන්වාදී ඇති සැකකරු පසුව ඔවුන් සමග හිතවත්කමක් ගොඩනගා ගෙන ඇති බවද කියා සිටි පොලිසිය පසුව සැකකරු ඔවුනට කෙටි ආහාර වර්ගයක් කෑමට ලබාදී පසුව බීම වර්ගයක් පානය කිරීමට ලබාදී ඇති බවයි සඳහන්කර සිටියේ.
සැකකරු ලබාදුන් බීම වර්ගය පානය කිරීමෙන් අනතුරුව කාන්තාවන් තිදෙනාම සිහිසුන් වු පසුව සැකකරු එම කාන්තාවන් ගෙල බැද සිටි රණ්භාණ්ඩ සියල්ල පැහැරගෙන බසයෙන් බැස පලාගොස් ඇති බවද අධිකරණයට දැනුම් දුන් පොලිසිය සිහිසුන් වු කාන්තාවන් තිදෙනා රෝහල්ගත කර ඇති බවද පවසා සිටියා.
සිසිටීව දර්ශන ඔස්සේ මේ පිළිබදව කඩිනම් විමර්ශනක් ඇරඹු බවද සදහන් කළ පොලිසිය ඒ අතර වාරයේ සැක කටයුතු හෝටලයක් පරීක්ෂා කිරීමේදී සැකකරු වෙනත් කාන්තාවක් සමග අදාළ හෝටලයේ කාමරයක් තුළ රැඳී සිටියදී අත්අඩංගුවට ගැනීමට හැකි වූ බවයි.
සිහිසුන්වීම නිසා රෝහල්ගත කළ කාන්තාවන්ට සැකකරු විසින් පානය කිරීමට ලබාදී ඇති මත්වන සුළු පානය සම්බන්ධයෙන් රස පරීක්ෂකවරයා මගින් වාර්තාවක් කැඳවීමට පැමිණිලිකාර කාන්තාවන් ප්රතිකාර ලබන රෝහල මගින් කටයුතු කරමින් පවතින බවයි වැඩිදුරටත් වාර්තා වෙන්නේ.
