විමල් වීරවංශ, පියංකර ජයරත්න, රාජිත සේනාරත්න, ජොන්ස්ටන් ප්රනාන්දු, සජින් වාස් ගුණවර්ධන, චාමර සම්පත්, සරණ ගුණවර්ධන, ලක්ෂ්මන් යාපා අබේවර්ධන, මර්වින් සිල්වා, නාමල් රාජපක්ෂ, ශෂීන්ද්ර රාජපක්ෂ, චම්පික රණවක, කෙහෙළිය රඹුක්වැල්ල, යෝෂිත රාජපක්ෂ ඇතුළු පිරිසකගේ නඩු තීන්දු ඉදිරියේ දී ඒමට හැකි බව කැබිනට් ප්රකාශක ඇමැති, වෛද්ය නලින්ද ජයතිස්ස මහතා පැවැසීය.
රජයේ ප්රවෘත්ති දෙපාර්තමේන්තුවේ ඊයේ (05) පැවැති කැබිනට් තීරණ දැනුම්දීමේ මාධ්ය හමුවට එක්වෙමින් ඇමැතිවරයා මේ බව කියා සිටියේය.
ඇමැතිවරයා වැඩිදුරටත් මෙසේද පැවැසීය. “සමහර නඩු කල් යන්නත් පුළුවන්. සරණ ගුණවර්ධනගේ නඩුව අප්රේල් 30 ද කොහේද තිබුණා මැයි 25ට කල් ගියා. පොඩ්ඩක් බලන් හිටියොත්, මතක තියන් හිටියොත් නඩු දින මතක තියා ගන්න පුළුවන්. එය සාමාන්ය දැනීමයි.
විවෘත අධිකරණයේ සිදුවන දේ ඔබ වාර්තා කරනවා. ඒ සියල්ලම බලාගෙන ඉඳලා ඉඳලා ඊට පරස්පර උඩුයටිකුරු තීන්දු ලබාදෙයි කියලා ජනතාවට වඩා මාධ්යවේදීන් හැටියට ඔබට හිතෙනවා මෙහෙමයි විය හැක්කේ කියලා. ජනාධිපතිවරයත් එහෙම වෙන්න ඇති කියන්න ඇත්තේ. නඩු එයිද කියන්න මම දන්නෙත් නැහැ. වැදගත් වෙන්නේ නඩු ටික සිදුවෙන එකයි. රටේ ජනතාව බලාපොරොත්තු වෙනවා හොරුන්ට දඬුවම් කරයි කියලා. ඔබ මගෙන් අහපු දේ තමයි හොරුන්ට දඬුවම් දෙන්නේ නැද්ද, ප්රමාද ඇයි කියලා. දඬුවම් දෙන ක්රියාවලිය තිබෙන්නේ නඩු හරහායි. නඩු දින ළඟ ළඟ වැටිලා නඩු ඉක්මන් වෙලා. ත්රිපුද්ගල මහධිකරණ ඇති වෙලා. එම කටයුතු වේගයෙන් සිදුවෙන කොට මම හිතනවා සාමාන්ය ජනතාවට දූෂණයට එරෙහි ජනතාවට ප්රසාදයක්. අස්වාදයක් තිබෙන්න ඕනි. ජනතා විමුක්ති පෙරමුණේ සාමාජිකයන්ට පමණක් නොවෙයි හැම පක්ෂයකම අයට තිබෙනවා හොරු ඇතුළට ගියාම සතුටක්. වටේ ඉන්න අය කියයි විරුද්ධව. රටේ බහුතරයක් ජනතාව ඉන්නේ නඩු විසඳයි කියලා. තුනෙන් දෙකක් තියාගෙන මොනවද කරන්නේ කියලා සමහරු අහනවා. නීති නැත්නම් නීති හදලා දඬුවම් කරන්න කියලයි ජනතාව කියන්නේ”යැයිද කීවේය.
