බත්තරමුල්ල පැලවත්ත රණවිරු ස්මාරක භූමියට අයුතු ඇතුල් වී පොලිස් නිලධාරීන්ගේ රාජකාරියට බාධා කළැයි කියන සිද්ධියට අදාළව ජාතික නිදහස් පෙරමුණේ නායක හිටපු පාර්ලිමේන්තු මන්ත්රී විමල් වීරවංශ ඇතුළු පිරිස සම්බන්ධයෙන් විමර්ශනයක් සිදු කර අධිකරණයට වාර්තා කරන ලෙස කඩුවෙල මහේස්ත්රාත් අරුණ ඉන්ද්රජිත් බුද්ධදාස අද (20) තලංගම පොලිසිය නියම කළා.
තලංගම පොලිසිය විසින් අද (20) මෙම පිරිසට එරෙහිව චෝදනා තුනක් යටතේ අධිකරණයට කරුණු වාර්තා කරනු ලැබූ අවස්ථාවේදී මහේත්රාත්වරයා මෙම නියෝගය නිකුත් කළා.
විජයග්රහණය සැමරීම සඳහා බත්තරමුල්ල රණවිරු ස්මාරකය අසල රණවිරු සැමරුම් උත්සවයට ජනාධිපතිරවරයා ඇතුළු මැති ඇමැතිවරුන් සහභාගී වීමට නියමිතව තිබූ බැවින් එය ආරක්ෂිත කලාපයක් ලෙස නම් කර තිබූ බව පොලිසිය අධිකරණයට කරුණු වාර්තා කර තිබුණා.
එසේ තිබියදී ඉකුත් 18 වැනිදා විමල් වීරවංශ අතුළු පිරිසක් එම භූමියට අයුතු ලෙස ඇතුළු වී, අයුතු ජනරාශියක සාමාජිකයන් වෙමින්, පොලිස් නිලධාරින්ගේ රාජකාරියට බාධා කරමින් හැසිරීම සහ පොලිසියට අඩන්තේට්ටම් කිරීම ලෙසින් ලංකා දණ්ඩ නිති සංග්රහය යටතේ ගැනෙන වැරදි සිදු කර ඇති බව පොලිසිය අධිකරණයට කරුණු ඉදිරිපත් කළා.
මෙහිදී විමල් වීරවංශ ඇතුළු පිරිස වෙනුවෙන් අධිකරණයට කරුණු ඉදිරිපත්කරමින් නිතීඥ කමල් විජේසිරි සඳහන් කර සිටියේ, පොලිසිය ඉදිරිපත් කරන ආකාරයේ සිද්ධියක් එම ස්ථානයේ සිදු නොවූ බවයි.
මෙහිදී අධිකරණයට කරුණු ඉදිරිපත් කළ නිතීඥවරයා මෙසේද ප්රකාශ කළා.
“ස්වාමිනි, පොලිසිය කියන ආකාරයට කිසිදු අයුතු ජනරාශියක් හෝ බලහත්හාරයෙන් එම ස්ථානයට ඇතුළුවීමක් සිදුවුණේ නෑ. මගේ සේවාදායකයින් මීට පෙර ආරක්ෂක අමාත්යාංශයේ ලේකම්වරයා වෙත ලිඛිතව කරන ලද ඉල්ලීමක් මත එම ස්ථානයට යන බවට දැනුම් දිලා තිබුණා. එහෙම දැනුම් දීලා තමයි ඒ අය එතැනට ගියේ.
එම ස්ථානයට පොදු මහජනතාවට ඇතුළු විය හැකි ස්ථානයක් මිස එය තහනම් කලාපයක් නොවෙයි. විශේෂයෙන්ම එම ස්ථානය පුද්ගලික හෝ අවසරයකින් තොරව ඇතුළු විය යුතු ස්ථානයක් නොවේ. මගේ සේවාදායකයින් ගියේ රණවිරුවන් සමරන්න. ඔවුන් ලිඛිතව දැනුම් දීලා අවසර අරගෙන ගිය සැමරීමට පොලිස් නිලධාරීන් තමයි බාධා කළේ. පොලිස් නිලධාරින් තමයි අනීතිකව කටයුතු කළේ. ස්වාමිනී, ඒ සම්බන්ධයෙන් සොයා බැලියු යුතුයි”
මෙහිදී අධිකරණය දැනුම් දුන්නේ මෙම සිද්ධිය සම්බන්ධයෙන් මේ වන විට ඇති තත්ත්වය විමර්ශන අවදියේ තිබෙන බවයි.
එබැවින් මෙහි සැකකරුවන් ලෙස නම් කිරීම හෝ වරෙන්තු නිකුත් කිරීමක් මේ අවස්ථාවේ සිදුකළ නොහැකි බව සඳහන් කළ මහේස්ත්රාත්වරයා සිද්ධියට අදාල විමර්ශන කඩිනමින් අවසන් කර අධිකරණයට වාර්තා කරන ලෙසට තලංගම පොලිසියට නියම කරමින් නඩුව කල් තැබුවා.
