2026 වසරේ ජනවාරිය, හෙළ සිනමාවට විශේෂත්වයෙන්ම මතක රැඳෙන මාසයක් වීමට නියමිතය. සත්ය සිදුවීම් පදනම් කරගත් දැවැන්ත නිර්මාණයකින් ආරම්භ වී, නව්ය සිනමා අත්දැකීම්, ජනප්රිය කතාමාලා වල දිගහැරුම් සහ ප්රවීණ රංගන ශිල්පීන්ගේ අවසන් මතක සලකුණු දක්වා විහිදී යන චිත්රපට රැසක්ම මේ ජනවාරියේදී ප්රේක්ෂකයා හමුවට එයි.
ජනවාරි 9 වැනිදා සිට තිරගත වීමට නියමිත “Father” චිත්රපටය, 70–90 දශකයන්හි ශ්රී ලංකාවේ සිදුවූ සත්ය සිදුවීම් මාලාවක් පදනම් කරගනිමින් නිර්මාණය වූ විශාල පරාසයක කතාවකි. සෞම්ය ලියනගේ, දිල්හානි අසෝකමාලා, ජගත් මනුවර්ණ, බිමල් ජයකොඩි ඇතුළු ප්රවීණ හා නව පරපුරේ රංගන ශිල්පීන් රැසක්ම එකම තිරයක එකතුවීම මෙහි විශේෂත්වයකි.
චමින්ද ජයසූරියගේ අධ්යක්ෂණයෙන්, EMIKA PRODUCTIONS වෙනුවෙන් ශාන්ත ගීතදේවගේ නිෂ්පාදනයක් ලෙසින් එළිදක්වන මෙම චිත්රපටය, අතීතයේ සිදුවූ සිදුවීම් අදට ගෙන එමින් සමාජ මතකය අවදි කිරීමට උත්සාහ කරයි.
“සයනයිඩ්” චිත්රපටය, ජීවිතයේ සාපේක්ෂතාවය සහ එක් නොසිතූ සිදුවීමකින් සියල්ල වෙනස් විය හැකි ආකාරය සිනමාත්මකව විමසා බලයි.
යුද්ධයේ අනිටු විපාකයන්, අතීතයේ අමතක නොකළ යුතු සිදුවීම්, කාල රාමු කිහිපයක් හරහා ගලා යන කතාවක් ලෙසින් මෙය ඉදිරිපත් වේ. නලින් රාජපක්ෂගේ අධ්යක්ෂණයෙන්, අපූරු කැමරා කෝණ, ඩ්රෝන දර්ශන සහ තීව්ර පසුබිම් සංගීතය සමඟ “සයනයිඩ්” නව පරපුරේ සිනමා රසිකයාට අමු අත්දැකීමක් ලබා දෙයි.
Drishyam චිත්රපට මාලාවේ දෙවන දිගහැරුම ලෙසින් මෙරට තිරයට එන “ධර්මයුද්ධය 2” ජනවාරි 2 වැනිදා සිට තිරගත වීමට නියමිතය. අරුණ ජයවර්ධනගේ අධ්යක්ෂණයෙන් නිර්මාණය වූ මෙම චිත්රපටය, “මහපොළොව මත මිහිදන් කළ කිසිදු රහසක් සදාකාලික නොවන බව අඟවයි.
පළමු කොටසෙන් විශාල ආදායම් වාර්තා තැබූ මෙම කතාමාලාවේ, හරිස්චන්ද්රගේ භූමිකාවට මෙවර බිමල් ජයකොඩි ජීවය දීමද විශේෂත්වයකි. දිල්හානි අශෝකමාලා, තිසුරි යුවනිකා, සනත් ගුණතිලක ඇතුළු විශාල රංගන පිරිසක් එක්වීමෙන් චිත්රපටයට දැවැන්තත්වයක් එක්වේ.
ජනවාරි 2 වැනිදා සිට තිරගත වීමට නියමිත “මලකි දුවේ නුඹ” හෙළ සිනමාවේ නිළි රැජින ලෙස කිරුළ පැලඳූ ආචාර්ය මාලනී ෆොන්සේකා රංගයෙන් දායක වූ අවසන් චිත්රපටය වීම නිසා විශේෂ ඉතිහාසීය වටිනාකමක් උසුලයි. වින්දන සහ කල්පන ආරියවංශ දෙසොහොයුරන්ගේ අධ්යක්ෂණයෙන් නිර්මාණය වූ මෙම චිත්රපටය, දේශීය සිනමා ශාලාවලට අමතරව කොල්කටා අන්තර්ජාතික සිනමා උළෙල නියෝජනය කිරීමට ද සමත් වීමෙන්, හෙළ සිනමාවේ ගුණාත්මකභාවය නැවතත් ජාත්යන්තරයට පෙන්වයි.
සත්ය සිදුවීම්, සමාජ-දේශපාලන මතක, නව්ය සිනමා භාෂාව සහ ප්රවීණ රංගන ශිල්පීන්ගේ දායකත්වය මෙම සියල්ල එකට ගලා එන 2026 ජනවාරිය, හෙළ සිනමාවට නව අවධියක් සලකුණු කරන මාසයක් බවට පත්ව ඇත. සිනමා රසිකයන්ට නම්, මේ ජනවාරිය පුරාම සිනමා ශාලා දෙසට ඇද හැලෙන උණුසුම අත්විඳීමට සූදානම් විය යුතු කාලයකි.
