පවුල් කීපයක පිරිසක් එක්ව පැවැත්වූ අවුරුදු උත්සවයකට සහභාගි වූ කුඩා දැරියක් ඊයේ (18) සවස පිළියන්දල දම්පේ ප්රදේශයේ හෝටලයක නාන තටාකයකට වැටි මිය ගොස් ඇතැයි පිළියන්දල පොලිසිය සඳහන් කරනවා.
සිද්ධියෙන් මිය ගොස් ඇත්තේ පැලැන්වත්ත ,පන්නිපිටිය පාර, මිහිඳුපුර පදිංචිව සිටි ඇරැව්වල ප්රදේශයේ ජාත්යන්තර පාසලක අධ්යාපනය ලබමින් සිටි මාවතගේ ඉහන්සා නමෝදී පෙරේරා නැමැති 06 හැවිරිදි දැරියයි.
දැරියගේ මව විදේශ ගතව සිටින අතර දැරිය පියාගේ සහෝදරියගේ සෙවනේ හැදී වැඩෙන බවත් පොලිස් විමර්ශනවලදී අනාවරණය වී ඇති බව පොලිසිය පවසනවා.
එම පවුලේ අය සහ සමීප පවුල්වල ඥාතීන් 40 ක පමණ පිරිසක් ඊයේ (18) පෙරවරු 8.15 ට පමණ පිළියන්දල දම්පේ ප්රදේශයේ හෝටලයට පැමිණ අවුරුදු උත්සවය පවත්වා විනෝද වී ඇති අතර සවස භාගයේ ජල තටාකය ආසන්න යේ රැඳී සිට ජල ක්රීඩාවේ යෙදීමට සූදානම්ව සිට ඇතැයි පොලිසිය සඳහන් කරනවා.
එම අවස්ථාවේ සවස 4.15 පමණ වන්නට වී ඇති අතර කුඩා දරුවන් සමග පුද්ගලයන් දස දෙනෙකු පමණ ජල තටාකය ආසන්නයේ රැඳී සිට ඇති අතර වැඩිහිටි පුද්ගලයන් සඳහා ජල තටාකයේ වෙන්ව තිබෙන ප්රදේශයේ රැඳී සිටි දැරියගේ මාමා කෙනෙකු ජල තටාකය තුලින් කළු පාට ගුලියක් වැනි දෙයක් හදිසියේම දැක විමසිලිමත් වී බැලීමේදී දැරිය දැක වහා ජල තටාකයට පැන දැරිය ගොඩට ගෙන මූලික ප්රථමධාර ක්ෂණිකව ලබාදී පිළියන්දල දිසාරෝහල වෙත රැගෙන ඒමට කටයුතු කර තිබූ බව පොලිසිය පවසනවා.
එහිදී වහා ක්රියාත්මක වූ වෛද්යවරුන් දැරිය ට අවශ්ය ප්රතිකාර ලබා දුන්නද දැරිය ඒ වන විටත් මියගොස් සිට ඇතැයි රෝහල් ප්රකාශකයකු පවසා තිබෙනවා.
පොලිසියේ දැනුම් දීම මත සිද්ධිය වූ ස්ථානයට ඊයේ රාත්රී ගිය පිළියන්දල කැස්බෑව හදිසි මරණ පරීක්ෂක අජිත් විජේසිංහ ස්ථානය පරීක්ෂණය මෙන්ම පිළියන්දල දිසා රෝහලේ මෘත ශරීරාගාරයේ තැන්පත් කර තිබෙනවා.
එම දැරියගේ සිරුර ද පරික්ෂා කර පශ්චාත් මරණ පරීක්ෂණය සඳහා මළ සිරුර කළුබෝවිල ශික්ෂණ රෝහලේ මෘත ශරීරාගාරයේ තැන්පත් කිරීමට අවශ්ය කටයුතු කරන ලෙස පොලිසියට නියෝග කළා.
පිළියන්දල පොලිසිය වැඩිදුර පරීක්ෂණ පවත්වනවා.
