මුදල් අමාත්යාංශයේ පරිගණක පද්ධතිවලට ඇතුළු වී හැකර්වරුන් සිදු කළ අමෙරිකානු ඩොලර් මිලියන 2.5ක මංකොල්ලය සම්බන්ධයෙන් ජාත්යන්තර මූල්ය අරමුදලේ (IMF) අවධානය යොමුව ඇති බව එහි ප්රකාශකයෙකු සඳහන් කළ බව අද (25) මෙරට දිනපතා ඉංග්රීසි පුවත්පතක් වාර්තා කර තිබෙනවා.
එසේම එම අරමුදල මේ පිළිබඳව සමීපව නිරීක්ෂණය කරමින් සිටින බවයි එම ප්රකාශකවරයා සඳහන් කර ඇත්තේ.
එම පුවත්පත නැගූ ප්රශ්නයකට පිළිතුරු දෙමින් ජාත්යන්තර මූල්ය අරමුදලේ ප්රකාශකයෙකු සඳහන් කර ඇත්තේ, ඔවුන් මෙම සිදුවීම පිළිබඳව සැලකිල්ලට ගෙන ඇති බවයි.
“විදේශ සම්පත් දෙපාර්තමේන්තුවේ (ERD) පරිගණක පද්ධති වෙත අනවසරයෙන් පිවිස ඇති බව තහවුරු කරමින් ශ්රී ලංකා මුදල් අමාත්යාංශය නිකුත් කළ ප්රකාශය පිළිබඳව අපි දැනුවත් වී සිටිමු. මේ පිළිබඳව අපි සටහන් කරගෙන ඇති අතර, පවතින තත්ත්වය සමීපව නිරීක්ෂණය කරමින් සිටිමු,” යැයි එම ප්රකාශකයා පවසා තිබෙනවා.
මෙම මුදල් ඔස්ට්රේලියාවට ගෙවිය යුතු ණය වාරිකයක් සඳහා වෙන් කර තිබූ ඒවා වන අතර, 2022 වසරේ ඇති වූ දරුණුතම ආර්ථික අර්බුදයෙන් පසු ශ්රී ලංකාව මේ වන විට ජාත්යන්තර මූල්ය අරමුදලේ වැඩසටහනක් යටතේ යථා තත්ත්වයට පත්වෙමින් සිටින බවයි එම පුවත්පත සඳහන් කර ඇත්තේ.
මීට පෙර ශ්රී ලංකාව අමෙරිකානු ඩොලර් බිලියන 46ක ණය ගෙවීම පැහැර හැර තිබුණා.
එම පුවත්පතට අනුව, ජාත්යන්තර මූල්ය අරමුදලේ විස්තීර්ණ අරමුදල් පහසුකම (EFF) යටතේ ශ්රී ලංකාවේ ප්රතිසංස්කරණ වැඩසටහනේ පස්වන සහ හයවන සමාලෝචන ඒකාබද්ධව අවසන් කිරීමට අදාළ ආර්ථික ප්රතිපත්ති සම්බන්ධයෙන් එම අරමුදල සහ මෙරට බලධාරීන් අතර කාර්ය මණ්ඩල මට්ටමේ එකඟතාවයකට එළඹ තිබෙනවා.
එසේම මෙම සමාලෝචනය ජාත්යන්තර මූල්ය අරමුදලේ විධායක මණ්ඩලය විසින් අනුමත කළ පසු, ශ්රී ලංකාවට අමෙරිකානු ඩොලර් මිලියන 700ක පමණ මූල්ය පහසුකම් ලබා ගැනීමට අවස්ථාව හිමි වෙනවා.
ජාත්යන්තර මූල්ය අරමුදලේ වැඩසටහන 2023 මාර්තු 20 වන දින අමෙරිකානු ඩොලර් බිලියන 3ක පමණ මුළු මුදලක් සඳහා එකඟ වී තිබුණු බවයි එම පුවත්පත වැඩිදුරටත් සඳහන් කර ඇත්තේ.
