නියෝජ්ය අමාත්ය එරංග වීරරත්න
” ඩිජිටල් පද්ධතිය හැක් වුණාට වැඩිය ඒ අන්තර ජාතික සමාගමට අනුරූපීව ඒ හා සමානවම ඩොමේන්, ඊ මේල් සහ පුද්ගලයින්ගේ නම් ඒ විදියටම එවලා නොමග යැවීමක්’‘ සිදුකර ඇතැයි නියෝජ්ය ඩිජිටල් ආර්ථික අමාත්ය එරංග වීරරත්න පවසනවා.
මාධ්ය හමුවේ අදහස් දක්වමින් අමාත්යවරයා මේ බව කියා සිටියා.
”අපි හිතනවා මේක ආයතනය අතුලේ ඉන්න අයගේ සම්බන්ධයකින් තොරව වූ දෙයක් කියලා. ඒක එවැනි වෙනසක් බව අවබෝධ නොකර ගැනීම නිසා වූ ප්රශ්නයක් කියලා අපිට හැඟෙනවා. නමුත් පරීක්ෂණ තවම යනවා ඒකෙන් අපිට දැනගන්න පුළුවන් වෙයි මේකට කවුරුත් සම්බන්ධද? නැද්ද? කොහොමද වුණේ? කොයි කාලේ ඉඳන්ද වුණේ ? කියන සම්පූර්ණ විස්තරයක්” බවයි නියෝජ්ය ඩිජිටල් ආර්ථික අමාත්යවරයා පැවසුවේ.
” ප්රධානම දේ තමයි නීතිය ක්රියාත්මක වෙන්න පරීක්ෂණයකින් හරියට සනාථ වෙන්න ඕන. ඒක දැන ගන්න දවස් කිහිපයක් සතියක් වගේ යයි. ඒ කටයුත්ත දැන් ක්රියාත්මක වෙනවා. සී.අයි.ඩීය, සර්ට් ආයතනය මහ බැංකුවේ ආයතනයකුත් එකතු වෙලා ඒ විමර්ශන කරනවා. ඒ වගේම අන්තර් ජාතික සමාගමුත් ඉදිරිපත් වෙලා තිබෙනවා මේ මුදල් කොහෙද ගියේ කියලා සොයන්න. මේ කටයුත්තට අමාත්යංශ කිහිපයකුත් සම්බන්ධ වෙලා තියෙනවා. ආරක්ෂක අමාත්යංශය, මහජන ආරක්ෂක අමාත්යංශය, ඩිජිටල් ආර්ථික අමාත්යංශය, මුදල් සහ ක්රමසම්පාදන අමාත්යංශය ඊට ඇතුලත්” බවද ඔහු සඳහන් කළා.
වැඩි දුරටත් අදහස් දැක්වූ නියෝජ්ය ඩිජිටල් ආර්ථික අමාත්ය එරංග වීරරත්න මෙසේද පැවසුවා.
”ඩිජිටල් ආර්ථික අමාත්යංශය මඟින් අපි රාජ්ය නිලධාරීන් දැනුවත් කරන්න දිගටම කටයුතු කරගෙන ආවා. මේක පොදු ජනතාව වුණත් මුහුණ පාන ගැටලුවක්. සොරකමක් කිරීමට වෙනත් පාර්ශ්වයක් ලෙස පෙනී සිටලා ඩිජිටල් මාධ්යයෙන් කටයුතු කිරීමට එරෙහිව ජනතාව දැනුවත් කිරීමට ඩිජිටල් ආර්ථික අමාත්යංශය ඉදිරියටත් කටයුතු කරනවා. ආයතනයක් විදියට අපි හැමෝම බලන්න ඕනෑ මේ පද්ධතිය සුරක්ෂිතව තබා ගන්න. ඒ වගේම සේවක සේවිකාවො දනගන්න ඕනෑ කොහොමද ඩිජිටල් පද්ධතිය පාවිච්චි කරන්නේ කියලා සහ ගනුදෙනු කරනකොට නිවැරදි භාවය පරීක්ෂා කළ යුතුයි.”
