අමෙරිකා එක්සත් ජනපදය සහ ඊශ්රායලය, ඉරානය සමග යුද්ධයකට අවතීර්ණ වූයේ එරට පාලන තන්ත්රයේ නායකත්වය වෙනුවට හිටපු ජනාධිපති මහමුද් අහමදිනෙජාඩ් (Mahmoud Ahmadinejad) පත් කිරීමේ අරමුණින් යුතුව බව ‘ද නිව්යෝර්ක් ටයිම්ස්’ (The New York Times) පුවත්පත වාර්තා කර තිබෙනවා.
මෙම සැලසුම පිළිබඳව දැනුවත් කර තිබූ අමෙරිකානු නිලධාරීන් උපුටා දක්වමින් එම පුවත්පත සඳහන් කර තිබුණේ, සැලසුම් කර තිබූ දේවල් ඉතා ඉක්මනින් අවුල් සහගත තත්ත්වයට පත් වූ බවත්, අහමදිනෙජාඩ්ගේ වත්මන් තත්ත්වය පිළිබඳව මෙතෙක් කිසිවක් නොදන්නා බවත්.
අයතුල්ලා අලි කමේනි ඝාතනය කිරීමෙන් අනතුරුව, ඉරානයේ පාලනය “එරට අභ්යන්තරයෙන්ම පැමිණි අයෙකු” වෙත පැවරීම වඩාත්ම සුදුසු වනු ඇතැයි අමෙරිකානු ජනාධිපති ඩොනල්ඩ් ට්රම්ප් අදහස් දැක්වූ බව ටයිම්ස් පුවත්පත වාර්තා කරනවා.
අහමදිනෙජාඩ්ව මේ සඳහා තෝරා ගැනීම අසාමාන්ය තේරීමක් යැයි පැවසීම ඉතාමත් අවතක්සේරු කිරීමක් යනුවෙන් එම පුවත්පත පෙන්වා දී තිබෙනවා.
“ඔහු ඉරාන පාලන තන්ත්රයේ නායකයන් සමග වඩාත් ගැටුම් ඇති කරගෙන තිබූ අතර ඉරාන බලධාරීන්ගේ දැඩි නිරීක්ෂණයට ද ලක්ව සිටියේය. එසේ වුවද, 2005 සිට 2013 දක්වා පැවති ඔහුගේ ජනාධිපති ධුර කාලය තුළ ඔහු ප්රසිද්ධියට පත්ව සිටියේ ‘ඊශ්රායලය ලෝක සිතියමෙන් අතුගා දැමිය යුතුයි’ යනුවෙන් කළ ප්රකාශයන් නිසාය. ඔහු ඉරානයේ න්යෂ්ටික වැඩසටහනේ දැඩි ආධාරකරුවෙකු වූ අතර, අමෙරිකා එක්සත් ජනපදයේ දැඩි විවේචකයෙකු මෙන්ම අභ්යන්තර මතභේද සහ විරෝධතා ප්රචණ්ඩකාරී ලෙස මර්දනය කිරීමට ද ප්රසිද්ධියක් උසුලන්නෙකි.” යනුවෙන් ද සඳහන් කර ඇති බවයි විදෙස් මාධ්ය සඳහන් කරන්නේ.
කෙසේ වෙතත්, 2019 වසරේ පැවති සම්මුඛ සාකච්ඡාවකදී අහමදිනෙජාඩ් ජනාධිපති ට්රම්ප්ව ඇගයීමට ලක් කර ඇති අතර, ඉරානය සහ අමෙරිකාව අතර සබඳතා යළි ගොඩනගා ගැනීම වෙනුවෙන් තර්ක කර ඇති බව ද එම පුවත්පත සටහන් කර තිබෙනවා.
“ට්රම්ප් යනු ක්රියාවෙන් වැඩ පෙන්වන මිනිසෙක්. ඔහු ව්යාපාරිකයෙකු වන අතර එම නිසා පිරිවැය සහ ප්රතිලාභ ගණනය කර තීරණ ගැනීමට ඔහුට හැකියාව තිබෙනවා. අප ඔහුට පවසන්නේ, කෙටිදෘෂ්ටික නොවී අපේ රටවල් දෙකේ දිගුකාලීන පිරිවැය-ප්රතිලාභ ගණනය කර බලමු කියායි.” යනුවෙන් අහමදිනෙජාඩ් පවසා ඇති බව එහි උපුටා දක්වා ඇති බව සඳහන්.
වෙනිසියුලානු නායක නිකලස් මදුරෝ පැහැර ගැනීම සඳහා දියත් කළ විශේෂ බලකා ප්රහාරයේ සාර්ථකත්වය සහ ඔහුගේ තාවකාලික අනුප්රාප්තිකයා වූ ඩෙල්සි රොඩ්රිගස් ධවල මන්දිරය සමග වැඩ කිරීමට දැක්වූ කැමැත්ත පිළිබඳව ජනපති ට්රම්ප් මහත් තෘප්තියට පත්ව සිටි බවත්, එම ආකෘතියම ඉරානය තුළ ද නැවත ක්රියාත්මක කළ හැකි බව ඔහු විශ්වාස කළ බවත්, ටයිම්ස් පුවත්පත වැඩිදුරටත් වාර්තා කර තිබෙනවා.
