ඉන්දුනීසියානු නාවික හමුදාවට අයත් ‘KRI BIMA SUCI – 945’ රුවල් නෞකාව සුහද සංචාරයක් සඳහා 2026 අප්රේල් 15 වන දින කොළඹ වරායට සේන්දු විය. එම නෞකාව ශ්රී ලංකා නාවික හමුදාව විසින් සාම්ප්රදායික නාවික ගෞරවාචාර මධ්යයේ උණුසුම් ලෙස පිළිගනු ලැබීය.
මෙම නෞකාවේ පැමිණීම ‘ASEAN Plus Cadet Sail (APCS) – 2026’ වැඩසටහනේ ප්රධාන අංගයක් වන අතර, ඉන්දුනීසියානු නාවික ශිෂ්යභටයින්ට අමතරව විවිධ රටවල් 26ක් නියෝජනය කරන නාවික ශිෂ්යභටයින් පිරිසක් ද මෙම සංචාරයට එක්ව සිටිති.
නෞකාවේ අණදෙන නිලධාරී ලෙස කොමාණ්ඩර් සුගෙන්ග් හරියන්තෝ (Commander SUGENG HARIYANTO) කටයුතු කරයි. නෞකාව දිවයිනේ රැඳී සිටින කාලය තුළ ශ්රී ලංකා නාවික හමුදාවේ පුහුණු වෙමින් සිටින නිලධාරීන් නෞකාව තුළ පැවැත්වෙන විවිධ වැඩසටහන් සඳහා සහභාගී වීමට නියමිත අතර, නාවික හමුදා පුද්ගලයින්ට එහි මෙහෙයුම් කටයුතු නිරීක්ෂණය කිරීමට ද අවස්ථාව හිමිවේ.
තවද, දෙරටේ නාවික හමුදාවන් අතර සහයෝගීතාවය සහ සුහදතාවය වර්ධනය කිරීම වෙනුවෙන් ශ්රී ලංකා නාවික හමුදාව විසින් සංවිධානය කරනු ලබන වැඩසටහන් කිහිපයකට නෞකාවේ කාර්ය මණ්ඩලය සහභාගී වීමට නියමිත අතර, ඔවුන් දිවයිනේ පවතින සංචාරක ආකර්ෂණීය ස්ථාන නැරඹීමට ද එක්වනු ඇත.
