2026 වෙසක් සහ පොසොන් පොහොය නිමිත්තෙන් දිවයින පුරා පවත්වනු ලබන දන්සැල්වල ආහාර සුරක්ෂිතතාව සහ මහජන සෞඛ්ය ආරක්ෂා කිරීම වෙනුවෙන් සෞඛ්ය සේවා අධ්යක්ෂ ජනරාල් වෛද්ය අසේල ගුණවර්ධන විසින් විශේෂ මාර්ගෝපදේශ මාලාවක් නිකුත් කර තිබෙනවා.
දිවයිනේ සියලුම සෞඛ්ය වෛද්ය නිලධාරීන් සහ ආහාර පාලක නිලධාරීන් වෙත යොමු කර ඇති මෙම උපදෙස් මාලාව මගින් දන්සැල් සංවිධායකයන් අනුගමනය කළ යුතු ප්රධාන කරුණු කිහිපයක් අවධාරණය කර තිබෙනවා.
එම මාර්ගෝපදේශ මාලාව පහතින්.
1. සියලුම දන්සැල් මහජන සෞඛ්ය පරීක්ෂක කොට්ඨාස මට්ටමින් සෞඛ්ය වෛද්ය නිලධාරි කාර්යාලයේ ලියාපදිංචි කළ යුතුය.
2. දන්සැල් පවත්වන ස්ථානය, පවත්වන අයගේ නම, ලිපිනය, දුරකතන අංකය වැනි මූලික තොරතුරු ලියාපදිංචියට ඇතුළත් කරගත යුතුය.
3. සෞඛ්යාරක්ෂිතව දන්සැල් පවත්වාගෙන යාම පිළිබඳව දන්සැල් සංවිධායකයින්ව මනාව දැනුවත් කළ යුතුය.
4. සෞඛ්ය වෛද්ය නිලධාරින් හා මහජන සෞඛ්ය පරීක්ෂකවරුන් විසින් දන්සැල් පරීක්ෂා කිරීමේදී, 2011 ආහාර ස්වස්ථතා රෙගුලාසි වලට අනුකූලව කටයුතු කරන බවට වග බලා ගත යුතුය.
5. දන්සැල් ආරම්භ කිරීමට පෙර සහ දන්සැල් අවසන් කිරීමෙන් පසු මහජන සෞඛ්ය පරීක්ෂක විසින් ස්ථානය පරික්ෂා කර සෞඛ්යාරක්ෂිත බව සහ පරිසර සෞඛ්යයට හානි නොවන බවට වග බලා ගත යුතුය.
6. ආරම්භයේ සිට අවසානය දක්වා නිසි කසළ කලමනා කරණ වැඩපිළිවෙලක් යොදා ගත යුතුය.
7. හැකි සෑම විටම ජාතික ජල සම්පාදන හා ජලාපවාහන මණ්ඩලයේ ජලය දන්සැලේ ආහාර සකස් කිරීමට සහ පරිභෝජනයට යොදා ගැනීමට වග බලා ගන්නා ලෙසත්, එසේ කළ නොහැකි අවස්ථා වලදී ආරක්ෂිත ජල මුලාශ්ර වලින් ජලය ලබා ගැනීමට කටයුතු කළ යුතුය.
8. දන්සැල ආශ්රිතව ආහාර අනුභවය සිදු කරන අවස්ථා වලදී අත් සේදීම සඳහා ජල පහසුකම් සහ අත් පිරිසිදුකාරක සපයා ඇති බවට සහතික කළ යුතුය.
9. දන්සැලේ ආහාර පිළියෙල කිරීම සහ පරිභෝජනය අතර කාලය පැය 04 කට නොවැඩි විය යුතුය.
